電話響起～
我：「你好，乜乜診所」
一把女聲：「喂？我可唔可以問啲嘢」
唔可以呀！要問應該問醫生嘛，問幾點收工就可以。
我：「問醫生嗎？我哋今日收八點，你八點前嚟到登記就可以啦」
佢：「唔駛問醫生㗎啦，你鍾意問埋醫生都冇問題，多個人答都冇問題」
答你屎忽。
我：「你要問啲咩呀？醫療建議方面嘅嘢我答唔到你呀，你要問呢啲嘅就要嚟睇醫生問醫生㗎啦」
佢：「唔係問呢啲呀，我想問我男朋友發育完未咋嘛」
你男朋友發育完未我又點知呢？
我：「咦，呢啲我答你唔到喎」
佢：「佢喺你哋度睇過醫生㗎」
我：「唔好意思，就算佢真係喺度睇過醫生，我哋都唔會答其他病人嘅嘢」
佢：「問吓都唔得㗎咩？」
我：「係呀，因為係病人私隱嚟㗎嘛」
佢：「私咩隱啫，我都睇過晒啦」
我：「都唔可以㗎，病人嘅嘢都只可以佢自己本人嚟問，或者佢要授權俾你」
佢：「我問咋喎」
我：「真係唔可以」
佢：「問佢發完育未都唔得㗎咩？」
好煩呀你，唔好loop好嗎？
我：「所有關於其他人嘅嘢一律唔可以答你啊」
佢：「我對佢嚟講算係其他人咩？」
你搞清楚個問題先好冇？
我：「我係指非本人問嘅嘢一律唔會答啊」
佢：「我問佢發完育未咋喎」
你咪自己直接問佢囉！
我：「小姐，我真係唔會答到你」
佢：「問你發完育未你又答唔答我呀？」
凡係問關於我嘅嘢，一律建議答『關你撚事』。
我：「小姐，你冷靜啲先，我都講到明你問啲唔屬於你嘅問題，我係答你唔到，我哋呢度係診所，係俾人唔舒服就嚟睇醫生嘅，咁如果你有唔舒服嘅就嚟睇醫生，其他嘢我答你唔到㗎」
佢：「佢屌得我唔舒服我打嚟問佢發完育未啫，咁係咪關我事呀？你都痴撚線㗎！」
嘟。
你都係問返佢啦，問我托咩～
Search